काठमाडौं : राजधानीमा एक कार्यक्रमको आयोजना गर्दै स्मिता दाहालको स्वर रहेको गीत ’जालैमा पार्छु’ सार्वजनिक गरिएको छ। सार्वजनिक गीतमा स्मितालाई गायनमा आशिष अविरलले साथ दिएका छन् भने शब्द एकनारायण भण्डारीको रहेको छ।

गीतलाई आशिषले नै कम्पोज गरेका हुन्। सार्वजनिक गीतको भिडियोमा आँचल शर्मा र विजु पार्कीसंगै स्मिता पनि देखिएकी छिन्। गीत सार्वजनिक कार्यक्रममा खानेपानी मन्त्री विना मगरले मन्तव्य राख्दै सफलताको शुभकामना दिइन्।

नातामा स्मिताको माइजू पर्ने मन्त्री मगरले आफ्नो परिवारबाट छुटै पथमा लागेकी भन्दै उनलाई शुभकामना दिइन्। ’हाम्रो परिवारको सबै राजनीतिमै छौँ। तर, उनले छुटै बाटो रोजेकी छिन्’ उनले भनिन् ’उनले निकै मेहनत गरिरहेकी छिन् र उनलाई सफलता मिल्नेमा दुईमत छैन।’ उनले गीत हेरिसकेपछि राम्रो लागेको प्रतिक्रिया दिइन्।

यसैगरी भरतपुर महानगरपालिका प्रमुख रेणु दाहालले पनि स्मिताले विस्तारै सफलता हासिल गर्दै गएको बताइन्। नातामा बहिनीको छोरी पर्ने स्मिताको आवाज सानैबाट नोटिस गरेको उनले बताइन्। ’तोते बोलीदेखि नै हामीलाई गीत गाएर सुनाउथिन्’ उनले भनिन् ’उनको मेहनतले नै उनलाई सफलतातर्फ बढाएको छ, यसको निरन्तरताको कामना गर्दछौँ।’

यसैगरी कर्यक्रममा उपस्थित गायक रामकृष्ण ढकालले गीत गाउने इच्छा जाहेर गरे। ’स्मिताले आफ्नो प्रतिभा विस्तारै देखाउँदैछिन् र मलाई पनि उनीसँगै गीत गाउने इच्छा छ’ उनले भने। उनले स्मिताले मोडलिङ पनि राम्रो गरेको भन्दै प्रसंसा गरे। यसैगरी, अभिनेता जितु नेपालले गायकीमा अगाडि बढ्ने विश्वास व्यक्त गरे।

यसरी माया र हौसला पाएकी स्मिताले आफू सिक्ने क्रममा रहेको बताइन्। ’म सिक्दैछु र आफुलाई थप परिपक्क बनाउने कोसिस गर्दैछु’ उनले भनिन् ’यस गीतलाई मेरो अघिल्ला गीतको तुलनामा केहि फरक बनाउने कोसिस गरेको छु।’ गीत तयार हुन् झन्डै एक वर्ष समय लागेको बताउँने स्मिताले आगामी दिनमा सबै किसिमको गीतसंगीतमार्फत चिनिन चाहेको बताइन्।

गीत एल्बममा संग्रहित हुनेछ भने दोस्रो गीत सार्वजनिक गर्दा एल्बमको जानकारी दिइने बताइयो। गीतलाई प्रवीन स्वारले कोरियोग्राफ तथा निर्देशन गरेका हुन्। गीतलाई गृष्मा ब्रोडकास्टिङले तयार पारेको हो। गृष्माका प्रमुख गृहेन्द्र घिमिरेले स्मिताको पहिलो गीतबाट सुरुवात गरेको र उनको अन्य गीतलाई पनि छिटै सार्वजनिक गर्ने बताए। ’हामीले विभिन्न कार्य गर्दैछौ त्यसैको सुरुवात हो’ उनले भने।

गृष्मा ब्रोडकास्टिङले ‘सप्तरंग’ को दोस्रो सिजनका छिटै गर्दैछ। पहिलो सिजन सातै प्रदेशमा शान्ति र सद्भावका लागि सात प्रदेशमा कार्यक्रम आयोजना गरेको गृष्माले दोस्रो सिजन पर्यटन प्रवर्द्धन र समुन्नतिको अभियानका रुपमा संचालन गर्नेछ। पर्यटन वर्ष २०२० को पूर्वसन्ध्यामा आयोजना गरिने यो कार्यक्रमले संगीत र मनोरञ्जन मात्र नभई स्थानीय कला संस्कृति पनि उजागर गर्नेछ।

Leave a Reply

Your email address will not be published. Required fields are marked *